AUF AM WASA GRASET D'HASA

Auf am Wasa graset d'Hasa
Ond em Nekker gampet d'Fisch
|: Lieber will i gar kei Schätzle
Als en sotta Fledrawisch! :|

Muettr, mueßt mr, schlag me 's Blechle
Türleshosa macha lao
|: Daß i au so Türleshosa
wia dr Herr Proviser hao :|

Gang mr aweg mit Sametschüehla
Gang mr aweg mit Bendela
|: Bauramädla send mr lieber
Wie so Kaffeebembela :|

Kleine Kügela mueß mr gießa
Wenn mr Vögela schießa will
|: Schöne Mädla mueß mr lieba
Wenn mr schöne Weiber will :|

Won i han no kratzt ond bissa
Hat mi wölla keine küssa!
|: Seit i nemme kratz ond beiß
Kriag i Küßla dutzendweis :|

Mon i han mei Schätzle gnomma
Hot mei Muettr grausig tao
|: Hot mi bei de Aohra gnomma
D'Stiega nabepfludra lao :|

Henter meinem Schwiegervater
Seinem graoßa Sekretär
|: Stoht a dicker Eichaknüppel
Wenn no net der Knüppel wär! :|

Henter meiner Schwiegermuettr
Ihrem graoßa Hemmelsbett
|: Stoht a ganzer Sack voll Sechser
Wenn i no dia Sechser hätt! :|